55 نصيحة قبل تشطيب شقتك

أهم النصائح قبل تشطيب شقتك :

1. متبتدأش في التنفيذ قبل ما يكون في تصميم داخلي (interior design) أو علي الأقل تصور مبدئي عن توزيع الفرش و نوع و شكل تشطيب الحوائط و الإسقف.
2. يفضل تستعين بمهندس ديكور محترم يعملك التصميم الداخلي طبقاً للستايل اللي انت عاوزه ويشرفلك على التنفيذ أو إنك ممكن تتفرج علي صور أو مواقع و تحاول تضبط مع كل صنايعي التأسيس اللي يناسب ده.
3. اهتم بالتأسيس والعزل جداً (سباكة و كهرباء).
4. في تأسيس الكهرباء هات السلك سويدي (original).
5. لازم تهتم بكل عنصر في أعمال التشطيب و خصوصاً الأجزاء اللي صعب الوصول ليها أو إن تصليحها هايحتاج تكسير و ده من خلال حاجتين إختيار صنايعي شاطر و اختيار خامات بجوده كويسه ومن مكان مضمون.
6. الصنايعي اللي يفكر يمد إيده علي عنصر إنشائي انه يكسر في عمود ولا سقف ويقولك عشان أمشي ماسوره أرفض.
7. متمشيش ورا صنايعي.
8. حدد كل الخامات قبل ماتبدأ في التنفيذ لأي بند واعتبرها قاعدة أساسية.
9. اختار أماكن ومناسيب برايز الكهرباء والدش والتليفون بعناية علشان هتضيقك لو مخترتهاش صح طبقاً للتصميم.
10. أسس للتكييف حتى لو مش هتركبة دلوقتي.
11. اشتري أطقم الحمام والمطبخ بالكامل قبل ما السباك يأسس.
12. في تأسيس السباكة مواسير التغذية Aquatherm أو Baninger ومواسير الصرف الشريف.
13. أساس الشغل تكنة عشان الشقة اللي تحتك نبه على العمال اللي في شقتك مايخمروش على الأرض.
14. اعزل الحمام و المطبخ عزل أسمنتي ولو الشقة اللي فوقك لسه متشطبتش اتأكد انه يعزل الحمام والمطبخ وبرضه هو كمان ميخمرش على الأرض.
15. ضروري تعمل اختبار ضغط مواسير السباكة ضد التسريب أو عيوب الصناعة من خلال الشركة المنتجة للمواسير.
16. البانيو اللي بيركب فوق أرضيه الحمام والأحواض والقاعدة المعلقة بيدوا وسع للحمام وأسهل في النضافة وشيك جداً.
17. لو حمامك ضيق ماتركبش بانيو قفل كابينة شاور عملية و شيك و هتديلك مساحة واسعة.
18. لو الريسبشن صغير متعملش حمام تالت.
19. حط أبليك على الحائط فوق السرير أفضل من أباجورة جنب السرير.
20. اشتري لمبات ليد سعرها غالي شوية بس هتديك أضاءة أفضل وفواتير كهربتك هتكون أقل.
21. متصغرش من مساحة المطبخ وتكون عامل حساب طربيزة أكل صغيرة جواه.
22. اهتم إنك تشتري شفاط توشيبا للمطبخ بمقاس 30 سم.
23. لو جبت سخان كهرباء هات سعة خزان كبيرة.
24. رخامة المطبخ تكون جرانيت مش رخام.
25. وانت بتصمم شقتك و بتفرشها إهتم براحتك و سعادتك أنت أكتر من إهتمامك بالضيوف اللي هتجيلك لأنك إنت اللي هتعيش في الشقة طول العمر مش الضيوف.
26. الليفنج أساسي متصغروش عشان الريسبشن.
27. فى النقاشة أسس بخامات اسكيب و شطب بخامات جوتن و خليك فاكر إن الشياكة في البساطة خلى أغلب الدهانات سادة بس اختار الألوان بتناغم وتناسق التفاصيل الكتير في الديكورات مش هتخليك تعرف تفرش.
28. الألوان المط بيبان فيا التراب الأفضل النص لامع.
29. الأبواب الخشب لو أرو أدهنها بوليستر لو مش أرو تاخد قشرة وتدهن بوليستر.
30. راجع على المحارة كويس لو فيها شرخ عالجة ولو فيها مطبات استخدم معجون أسمنتي قبل الدهانات.
31. ألوان الأبواب و الشبابيك و الحوائط و الأسقف و الموبيليا و السجاد و الفرش والستائر و والتحف والأنتيك والإكسسورات لازم يكون بينهم تناسق وتناغم.
32. في الأبواب باب الشقة مصفح و أبواب الغرف أختار نوع خشب كويس.
33. خلي النجار يركبلك جوانات كاوتش لكل الأبواب بتعزل الصوت والحرارة والإتربة.
34. تقدر تركب وش MDF لو الأبواب عندك قديمة ومش حابب تغيرها.
35. ركب معابر بتمنع الصوت والضوء الخارجي والحشرات.
36. ركب شبابيك ألومنيوم وخلى غرفة النوم زجاج دبل.
37. الزجاج العاكس بيحجب 50 % بس الصبح باليل لا يحجب.
38. الشباك الجرار بيساعد على سهولة الفرش وبيقلل الإضاءة والتهوية.
39. الشباك المفصلي عكسه بيزود الإضاءة والتهوية وبيحكم الفرش.
40. لو شقتك واسعة يبقي شباك مفصلي لو ضيقة يبقي شباك جرار.
41. كل الشبابيك أحقن حواليها فوم من الخارج وسيلكون من الداخل لعزل الصوت والحرارة والإتربة.
42. الشبابيك ال PVC ممتازة.
43. وطبعاً سلك لكل الشبابيك.
44. السلك الصلب بيصدي والفايبر بيتقطم هاته صلب وادهنه.
45. أكرة الأبواب والكوالين والخلاطات و الإكسسوار و النواكل لازم تناسب ستايل الفرش وتبقى من ماركه معتمده و مكان موثوق فية زي كوميكس مثلاً.
46. الأسقف الأسترتش اللامع هو الأفضل للديكورات حالياً من الجيبسوم بورد.
47. الكرانيش الفيوتك الجاهزة أفضل من الجبس العادي.
48. ديكورات CNC تحفة.
49. وانت بتختار البورسلين قطع ليزر لازم يبقي اللحام زيرو ويكون فرز أول والتركيب من خلال صنايعي شاطر علشان البورسلين ميطبلش.
50. أصل سقية لحام السيراميك هو الجراوت الأسمنت الأبيض بينطر وبيصفر.
51. سيراميك الجوهرة أفضل من كليوباترا بكتير جداً.
52. ال hdf بيبقي حلو في غرف النوم بيدي أحساس بالدفء و بيتركب علي بلاط أو سيراميك بواقي نراعي إن ما نجرش الفرش عليه علشان ما يتجرحش و ممكن كل فتره نقشطه و يتلمع فايرجع زي الاول.
53. أحقن حوالين البانيو والقاعدة والحوض من جميع الإتجاهات والإركان للحمام والمطبخ بمادة حقن الفواصل من شركة سيكا.
54. البراقع والبلتكنات والسبونش لو فرشك ستيل اعمل بيت ستاره هايكون أشيك وأوفر ويمشي مع كل أشكال الفرش.
55. أعمل حساب إي حاجه حتى لو مش هتقدر تجيبها دلوقتي زي الديب فريزر والميكرويف وغسالة الاطباق.