لو هتتجوزي قريب خلي بالك

أي بنوتة جميلة لسه متجوزتش هقولك كام نقطة كده قبل ما تروحي بيت زوجك وبعد ما تروحي وربنا يوفقنا جميعًا 💛

اتعلمي وانتي في بيت أهلك لسه تعتمدي على نفسك ك أكلك وشربك ولبسك .. 

ادرسي فقه الزواج وحقوق الزوج على الزوجة وحقوق الزوجة على الزوج وحقوق الأبناء على الأباء متوفر كتب لكده والحمدلله نبينا الكريم صلى الله عليه وسلم لم يترك صغيرة ولا كبيرة إلا وعلمنا إياها فالحمدلله على نعمة الإسلام وكفى بها نعمة ليه بقى الكلام ده عشان لما تروحي بيت زوجك ترتاحي متتصدميش بالواقع وفكك من كلام الروايات عشان الواقع غير !

لو نزلتي مثلا ولاقيتي البيت ناقص حاجة وزوجك مش فاضي هاتيها وانتي جاية هتوفري على نفسك كتير كوقت وجهد وغيره وطالما انتي فاكرة الحاجة انجزي نفسك 

سيبك من بتوع واجيب ليه هو يجيب كل حاجة  الزواج مشاركة واكيد لو فاضي هيجيب مش هيقولك لأ ..

حاجات كتير لازم تتعلميها في بيتكم متكونيش انسانة اتكالية مش لازم مامتك اللي تعملك كل حاجة اتعلمي تشيلي المسئولية واهم حاجة تتعلميها انك تتأقلمي على الجلوس لوحدك لفترات كبيرة أه وربنا عشان لما تروحي بيت زوجك لو ظروف شغله وقت كبير متنكديش على نفسك وعليه هو غصب عنه ..

بس استغلي الفترات دي في حاجة مفيدة زي ورد القرآن أو الأذكار أو تراجعي قرآنك أو درس تشحني به قلبك أو تقرائي كتاب تستفادي به وممكن تتفرجي على كرتون بردو كنوع من أنواع الترفيه

ربنا يعينا ويعينكم على الحاجات دي  ويجعلنا ممن يقولون ما يفعلون.. 

اتعلمي تغسلي المواعين أول بأول أول بأول عشان هتلاقي ف لحظة كل المواعين اللي جبتيها ف جهازك ف الحوض وانتي واقفة تستغفري ربنا على المنظر وتطلعي بره وتدخلي تستغفري وتطلعي بره فأي معلقة تستخدميها ف ساعتها اغسليها وخاصة الأكلات اللي بتحتاج مواعين كتير كالكشري المصري والمكرونة بالبشاميل وغيرهم

اتعلمي تكوني نضيفة في نفسك وبيتك عشان نفسك ف المقام الأول قبل أي حاجة ثم للراجل اللي اتجوزتيه هيدعيلك والله 

اتعلمي التغافل مش كل حاجة تبقي قفوشة وتعملي مشكلة وهم ممكن المشكلة تنتهي بسهولة لو مقعدتيش تنكدي على نفسك وتدي فرصة للشيطان يتمكن منك ومن تفكيرك وافتكري انه أكتر حاجة بتفرحه انه يفرق بين زوجين ف متديش له الفرصة

كل ما تلاقي الوسوسة اشتغلت وهتنكدي فاحسني الظن واستغفري الله واستعيذي بالله من الشيطان الرجيم وياريت لو تقومي تصلي ركعتين لله وتدعي فيهم بالهداية لقلبك وقلب زوجك.. 

متسمحيش لأي حد مهما كان مين هو انه يتدخل في حياتك انتي وزوجك وتربية أولادك حتى لو لسه أولادك مجوش الدنيا واللي يحاول يتدخل وقفيه عند حده بالذوق موقفش بالذوق يبقى وقفيه غصب عنه 

دي حياتك انتي وزوجك وأولادك محدش عايش معاكم ولا عارف انتم بتمروا بإيه ولا بتتغافلوا قد ايه عن سخافة البعض وقلة ذوقهم ف استعيني بالله وادعي كتير واسعي انك تطبقي الخطوات دي 

اتعلمي تشكري ولو على أقل حاجة اشكري قولي جزاك الله خيرا  كفاية انك عملت الحاجة دي كفاية انها منك حتى لو لبانة افرحي بها حسسي اللي قدامك بالتقدير مش شرط زوجك بس اتعلمي تقدري وتشكري وتحسسي اللي قدامك انه قدر يفرحك هتفرق في قلبه كتير من لم يشكر الناس لم يشكر الله.. 

اتعلمي الهزار الحلو مش الدبش وقلة الذوق والأسلوب المقزز لا خليكي حكيمة ورقيقة كده الدبش مش روشنة ده قلة ذوق 

حاجة كمان لما تتعلمي تشيلي مسئولية نفسك في بيت أهلك هتربي جيل غير اتكالي انتي مترهقكيش في تربيته هتعلميه يعتمد على نفسه لكن لو انتي كنتي اتكاليه ف ذريتك هتكون زيك وهتلاقي نفسك دايرة في ساقية الحياة وافنيتي حياتك عشان أولادك وف الاخر هتكوني لوحدك فاتعلمي عشان تقدري تعلمي ..

ادعي كتير ربنا يألف بينك وبين زوجك ويصلح ذات بينكم ويهديكم سبل السلام 

حصني نفسك وزوجك وبيتك بالأذكار وخاصة أذكار الصباح والمساء

عشان في ناس هتقعد تقولك واو وايه ده وممكن انتم اصلا زعلانينن مع بعض بس مش بتبينوا ده قدام الناس ف حصني نفسك 

لما تخرجي استودعي بيتك عند ربنا ولما زوجك يخرج استودعيه عند ربنا وادعيله انه ربنا يكفيه شر طريقه ويجنبه الفتن ويرزقه رزق حلال طيب مبارك  وخليه يسمعك وانتي بتدعيله هيفرح على فكرة

ادعي ربنا كتير انه يربي لك أولادك ..

خليكي استرونج اندبندنت أنثي جميلة رقيقة كده مشاركة حنونة طيبة جدعة  مش الرأس بالرأس كل واحد له دوره 

اتعلمي دينك صح والله هيربي قلبك وحياتك هيعلمك تكوني تقية نقية حافظة للغيب بما حفظ الله  عينك مليانة لا بتبصي لحياة دي ودي واشمعنى ومش اشمعنى وتقولي اللي معايا مبيعملش كده ليه كل واحد وله ظروفه واهم حاجة المعاملة الحسنة وانه يتقي ربنا فيكي سيبك من جو الشو والخروجات الكتير اهم حاجة لما يتقفل الباب عليكم المعاملة ازاي ولما تكونوا وسط ناس التقدير لكي ازاي والمعاملة ازاي وإحساسك بوجودك وانتي جنبه 

السعادة مش بالمجايب الكتير ولا بالفلوس السعادة بالكلمة الطيبة وبالشكر والأحترام والتقدير  بالمشاركة 

لكن هتبصي لدي ودي والله ما هتتهني في حياتك ابدا 

ولما ترضي بحياتك معاه طالما بيسعى للرزق الحلال لما ربنا يكرمه هيقدر صبرك وهيسعى بكل الطرق انه يفرحك

اتعلمي تصوني زوجك في غيابه قبل وجوده اجتنبي الفتن مهما كانت متدخليش نفسك ف حاجة انتي عارفة انها ممكن تعمل مشكلة

اتعلمي تردي غيبته ترفعي من شأنه متقليليش منه ابدا مهما حصل قدام أي حد مهما كان مين  متقعديش تشكيه لدي ودي ولا تنشري حاجات من السخيفة اللي بنشوفها على وسائل التفرق الإجتماعي ولا على التليفونات وتكلمي دي ودي ده عمل وعمل وعمل اللي بتحكي لها هتكرهه اصلا وهتكرهك فيه وممكن هو فيه حاجات حلوة هي مش عارفاها ف انتي الزمي الدعاء والاستغفار واستعيني بالله في كل وقت

اديله برستيجه بمعنى أصح 

لو حصل مشكلة لو تعرفي تسكتي يكون أحسن والله عشان هتلاقي نفسك بترمي كلام تندمي عليه بعد كده ممكن انتي تنسيه بس بيعلم في قلب الراجل وبيجرح كرامته وبيعمل شرخ كبير ومش هيقولك على فكرة ممكن يحسسك انه عدى الموقف بس هو مجروح منك أوي وهتحسي بفجوة بعد كده وعدم رضا عن حياتك ف حاولي مرة ف مرة تلمي الدور وتخرجي بره المكان اللي فيه الخناقة عشان تخلص واستغفري كتير واهدي خالص  واوعي تهيني الراجل أو تعايريه او تقارنيه بأي حد مهما كان مين إياكي ثم إياكي ثم إياكي احفظي لسانك واتقي الله ف نفسك كده 

أسأل الله ان يحفظنا جميعا ويكفينا شر خلقه ويديم علينا فضله ويفقهنا في ديننا ويعينا على تطبيقه 

لو حسيتي بتقصيرك في دينك ارمي اللوم على نفسك في المقام الأول واستعيني بالله وابدائي من اول وجديد واشحني قلبك متستنيش إنه يجي ادعيله بالهداية كتير مترميش تقصيرك انتي على شماعة غيرك مهما كان مين 

ياريت متنطقيش كلمة انت السبب في اللي انا فيه عايزة تحسسيه بالمسئولية يبقى باسلوب حلو مش اسلوب لوم واتهام عشان تقدروا تعدوا الأزمة سوا

حاجة أخيرة حبي زوجك واتقي ربنا فيه ولكن لا تعلقي قلبك إلا بالله رضا الله في المقام الأول قبل أي شىء وبرضا ربنا كل حاجة في حياتك هتكون تمام بإذنه

شوية حاجات على الماشي

وشوية خبرات وحاجات اتعلمتها قبل ما اتزوج وبعد ما تزوجت..💛