إزاى أربى عيالى ؟
سؤال يشغل تفكير معظم الناس خاصة وإحنا شايفين الأجيال اللى طالعة بعادات وتقاليد مختلفة تماما عن التقاليد اللى اتربينا عليها
أولا تربية الأطفال بتبدأ قبل الزواج
ازاى
أول خطوة فى التربية الصحيحة للأطفال هى الاختيار الصحيح للشريك اللى هيربى اطفالى معايا
أنا كزوج محتاج زوجة أمينة متربية كويس تتقى الله تغرس القيم الصحيحة و الأخلاق الحميدة فى نفوس أطفالى
لأن الاطفال يقلدون ما يرونه أمامهم
وأكتر شخص موجود أمامهم باستمرار هى الأم
فاذا استقامت الأم استقام الأبناء
واذا فسدت الأم فسد الأبناء لأن فاقد الشيء لا يعطيه
وكذلك أنا كزوجة محتاجة شريك يمثل نموذج جيد لأولادى لأن الأب يعتبر مثل أعلى لأولاده دائما
فالاختيار الجيد للزوج و للزوجة قبل الزواج هو أول خطوة فى تربية الأبناء
وكذلك الجينات الوراثية عليها عامل كبير فى طباع الأبناء
ثانيا محاولة عزل الخلافات الزوجية بعيدا عن الأطفال
لأن خناقات الزوجين أمام الأطفال بتضيع النظرة المثالية للوالدين عندهم وبالتالى هيبحثوا عنها خارج البيت
ثالثا
احتضان الاطفال كتير والانصات لهم والاهتمام بالتفاصيل التافهة من وجهة نظرنا ولكنها كبيرة عندهم فى عالمهم الصغير
الحاجات دي بتعود الطفل انه يحكى كل شيء للوالدين دون خوف وبالتالى نفضل جنبهم بالنصيحة والتوجيه
رابعاً
اننا نعود الاطفال انهم يعتمدوا على نفسهم منذ الصغر ودا شيء مهم جدا
يعني نعود الطفل انه يشيل الحاجة اللى وقعت منه تانى
لما يقع وهو ماشى يقوم لوحده
ينضف المكان اللى كان بيلعب فيه بعد ما يخلص لعب
يربط رباط جزمته لوحده بعد ما نعلمه كذا مرة طبعا
يكتب واجبه بنفسه ولو احتاج مساعدتنا يبقى شفوى بس ومش كل مرة هنساعده
لما يحاول يتعلم حاجة وميعرفش نشجعه يحاول تانى
مش كل حاجة يطلبها يلاقيها ولازم يتعود علي كده
لو عايز يشترى حاجة غير ضرورية وغير ضارة يبقى يحوش من مصروفه ويشتريها عادى
وهكذا
خامسا العدل
لازم نعدل بين الأطفال
لو اشتريت لواحد حاجة لازم تشترى للباقيين
فى الأكل كلهم متساويين
فى المعاملة بنحبهم كلهم حتى اللى مطلعين عينينا 😁
فى البوس والأحضان لازم الكل ياخد نصيبه متساويين
سادسا
مهم اننا نفصل بين أولادنا وبين أخطاءهم
ابنى حبيبى مهما يعمل
لما بعاقب فانا بعاقب على الغلط وليس بعاقب ابنى كشخصه
أكره الغلط ولكن لا أكره ابنى
لو ضربته يبقى كذا خبطة وخلاص مش حفلة تعذيب هى يعنى
وبعد الكذا خبطة دى لما يرجعلى يتكلم معايا أتكلم معاه كويس وكإن محصلش حاجة
غلط جدا اننا نخاصم الطفل يوم ويومين
دا هيكسر ثقته بنفسه وهيقسى قلبه مع الوقت
سابعا تحرى الحلال
التركيز على ان أى قرش يدخل بيتى يكون من حلال
لأن الفلوس الحرام بتدمر البيوت
لما يكون دخلى محدود بس كله حلال هلاقى بركة فى بيتى وأولادى وزوجتى وبعد فترة هتلاقيهم متجوزين وعايشين فى نعيم وبركة
ثامنا احذري الدعاء على اولادك
اضربيهم اشتميهم اعملى اى حاجة الا الدعاء عليهم
لأن دعاء الوالدين مستجاب
دايما ادعيلهم بالهداية واحتسبى تعبك عند الله
والأب يحتسب كل جنيه يصرفه على بيته من حلال عند الله
وأخيرا
أولادنا رسالة وأمانة زى ما أهلنا ربونا فاحنا بنربى اولادنا اللى هيربوا أولادهم بعد كده وهكذا
أمانة لو حافظنا عليها هتدخلنا الجنة
ولو ضيعناها ربنا هيسألنا عنها
اللهم ربى لنا أبناءنا 🌹
تعليقات
إرسال تعليق