القائمة الرئيسية

الصفحات

خد بالك وانت بتكتب أي عقد

خلي بالك وانت بتكتب أي عقد


١ - العقد مش بيبقى باطل لو من غير شهود موقعين عليه المهم توقيع الشخص البائع مش الشهود لكن طبعاً الشهود بتدعم موقفك وتقدر تستعين بيهم عند نشؤء اي منازعه من البائع. 




٢ - العقد لازم يتكتب فيه تاريخ مينفعش يكون فاضى وحضرتك تقول نبقى نكتب التاريخ بعدين 




٣ - لازم تكتب ثمن الشئ المبيع، مفيش حاجه اسمها خالص الثمن حضرتك بتكتب فى العقد أن تمن الشيء المبيع كذا وتم سداد كامل الثمن بمجلس العقد ماينفعش تقولى اكتب خالص الثمن حضرتك مش بتشترى من كارفور ده عقد وله بنود وشروط 




٤ -التوقيع على كل صفحات العقد مش على اخر صفحه بس سواء بائع أو مشترى تمضى على كل ورقة ياريت ماتستسهلش وتكسل  




٥ - قولنا مليون مرة فى فرق بين صحة التوقيع والتسجيل ومش كل العقود ينفع تتسجل فى الشهر العقارى ومش معنى أن العقد عليه ختم صحة توقيع يبقى اتسجل 




٦ - مافيش حاجه اسمها تنازل على ظهر العقد ويبقى كده اشتريت ... اشتريت يعنى اعمل عقد بيع وشراء 




٧ - ياريت لما حضرتك تشترى شقة 

 أو تأجر تاخد آخر إيصالات مياه وكهرباء وغاز علشان لو المشترى باعلك مش حتشوف وشه تانى وغصب عنك هتدفعهم 




٨ - صحه التوقيع مهمة وبتثبت تاريخ البيع وتوقيع البائع والمشترى ماتعملش ناصح وتقول مالهاش لازمه علشان ماتندمش بعد كده 

 وعلى فكره ينفع المشترى يرفع صحة توقيع على البائع وكمان ينفع البائع يرفع صحة توقيع على المشترى مافيهاش حاجه كل واحد يضمن حقه 




٩ - لو حضرتك اشتريت شقه تمليك ومالكش حصة فى الارض والبيت وقع كده حضرتك مالكش اى حاجه يعنى حضرتك اشتريت حيطان بس. ودي نقطه مهمه جدا 




١٠ - لو اشتريت شقه من واحد والشخص ده اتوفى بعد ماباع لك من حقك ترفع صحة توقيع على ورثته عادى و تقدر تختصمهم في الدعوى والحكم يصدر في مواجهتهم. 





١١ - عقد الإيجار ممكن يتعمل عليه صحه توقيع لو مدة الإيجار اكتر من ٩ سنوات ولو أقل من كده يبقى إثبات تاريخ في الشهر العقارى. 





١٢ - ياريت قبل ماتشترى شقه تسأل هل صدر لها قرار تمكين ولا لا علشان لو زوجة البائع كانت عامله قرار تمكين للشقه قبل مايبعها يبقى عليه العوض ومنه العوض وهتدخل في دوامه انت في غنى عنها و أفضل طبعا لما تشترى شقه تكون خاليه من المشاكل إلى من النوع داه 





١٣ - ياريت لما تشترى شقه ويكون عليها أقساط تعمل العقد من ٣ نسخ البائع ياخد نسخه والمشترى ياخد نسختين علشان لما حضرتك ترفع صحه توقيع للعقد المحكمه لازم يكون قدامها أصل العقد وطبعا المحامى مش حيقدر يسحب الأصل غير لما القضيه تخلص ... 





١٤ - على فكره عادى جدا انك ترفع دعوى صحه توقيع على عقد ابتدائى أو عقد لسه عليه أقساط مافيهاش مشكله 



هل اعجبك الموضوع :

تعليقات