ازاي تكتب بيانات ايصال الامانه بشكل قانونى سليم
الموضوع بسيط جدا لكن بعض الناس بتغلط فيه للاسف فحبيت اوضحه في نقاط بايجاز شديد.
- فيه دفاتر بتتباع في المكتبات فيها ايصالات مطبوعه ( زي اللي في الصوره ) وتقدر برضه تكتبه في ورقه عاديه لو مكنش معاك ايصال مطبوع.
ونقدر نحدد اهم العناصر وفق الترقيم اللي في الصوره كما يلي :-
- - خانه ( ١ ) بتكتب فيها اسم الشخص اللي انت هتمضيه على ايصال الامانه ، يعني الشخص اللي خد منك الفلوس.
- - خانه ( ٢ ) بتكتب فيها عنوانه بالتفصيل من واقع بطاقة الرقم القومي بتاعته.
- - خانه ( ٣ ) بتكتب فيها رقم بطاقته بالكامل ( ١٤ رقم ).
- - خانه ( ٤ ) بتكتب فيها تاريخ صدور البطاقه ، وده بيكون في اعلى اليسار في خلفيه البطاقه ، عباره عن الشهر والسنه.
- - خانه ( ٥ ) بتكتب فيها اسم حضرتك.
- - خانه ( ٦ ) بتكتب فيها المبلغ بالارقام ثم بالحروف.
- - خانه ( ٧ ) بتكتب فيها اسم الشخص التابع ليك ، اللي المفروض هيستلم الفلوس من الشخص الموقع علي الايصال.
- - خانه ( ٨ ) توقيع الشخص رقم ١ اللي استلم منك الفلوس.
- - خانه ( ٩ ) البصمة بتاعت نفس الشخص اللي استلم الفلوس ، رقم ١.
- - الخطوط الحمراء دي المكان اللي بتقطع منه اصل الايصال عن كعب الايصال رقم ( ١٠ ) وده المفترض انه بيكون موجود في دفتر ايصالات الامانه ، زي الشيكات كدا.
ملحوظات هامه عند كتابة وصل أمانه :-
- الافضل ان الايصال كله يحرر بخط من وقعه.
- ضروري جداا ان الايصال كله يتملي في ذات لحظة كتابته ، وبنفس القلم ، يعني متمضيهوش ايصال على بياض وتيجي انت تكتب الصُلب بعدها بشهور.
- ضروري تحتفظ بصورة بطاقة الرقم القومي لشخص الموقع علي الايصال.
- متكتبش تاريخ على الايصال لانك لو كتبت تاريخ ومر عليه ثلاث سنوات لم ترفع الايصال خلالها هتكون الدعوى سقطت بالتقادم ، وانا عارف ان فيه رأي فقهي بيقول ان العبره بتاريخ الامتناع عن تسليم المبلغ وليس بتاريخ تسلمه شبيه بقايمه المنقولات كدا لكن الاتجاه الغالب في المحاكم انه بعد ثلاث سنوات من تاريخ الايصال المحكمه بتحكم بانقضاء الدعوي فالافضل عدم كتابة تاريخ بدلا من الدخول في جدل فقهى .
تعليقات
إرسال تعليق