علاج فقدان الشهية عند الأطفال

⭐️اولا: الاطفال اللى اقل من سنة 

السيطرة على الطفل فى العمر ده فى موضوع الاكل بيكون صعب.. اهم حاجة انصح بيها..

- نبدأ الاكل وشرب الماية فى العمر الصح من نهاية الرابع لنهاية السادس.. لا بدرى عن كده ولا متأخر..

- نبدأ بالخضار ثم الارز والشوفان ثم الفاكهة والزبادى..

- ممنوع نهائيااااااا اضافة السكر او اعطاء بسكوت او كيك او شيبسيات قبل عمر سنة.. 

- لو طفل وصل ٩شهور ومانع الاكل وكل اعتماده على الرضاعة فى اغلب الاحيان هيكون عنده انيميا نقص حديد لازم نعمل تحليل صورة دم كاملة CBC ونهالج الانيميا..

- لو طفل مانع الاكل نهائى -مدأش الاكل- او كل ما ياكل يرجع الموضوع بيكون فى الاغلب ارتجاع بالمرئ ندى فى الحالة دى:

Tritone susp 

٢سم بالفم ٣مرات يوميا قبل الرضاعة بربع ساعة 

Nexium 10mg sachets ٥باكو فقط 

نصف باكو على ٥سم ماء سبق غليه مرة يوميا مساءا لمدة اسبوعين..

⭐️ثانيا: الاطفال اللى اكبر من سنة:

-لازم نعرف فى الاول ان الاطفال من عمر ١-٦سنوات الطبيعى جدا ان يكون عندهم فقدان شهية..

-لازم اول حاجة نحدد اذا كان الطفل رافض الاكل من فترة مؤقتة وده فى الاغلب بيكون عنده سبب مرضى زى التهاب الحلق او التهاب بالمعدة او دور سخونية وتعب وده هيحتاج كشف لو الموضوع زيادة اوى عشان نحدد السبب ونعالجه..

-لو رافض من فترة طويلة نتبع الآتى:

حل الطفل المتعب في الأكل أو بياكل أكل معين ومش بيحب يغيره 👇

١- لو رفض ياكل في وقت تقديم الاكل مفيش داعي للصريخ في وشه والضرب أو إنك طول النهار بتجري وراه بالطبق والمعلقة و تؤمريه إنه يمسح الطبق مسح ... دا بيخلي الطفل يربط الأكل بالتوتر اللي إنت بتعمليه ف بيكره الاكل أكتر

٢-الأكل لازم يكون ليه مواعيد يتقدم فيها ..لو رفض الطفل الأكل في الموعد المحدد .. شيلي الأكل من قدامه بمنتهى الهدوء وما تحسيسهوش بالذنب بس لو طلب أكل بعد كده عرفيه إنه في ميعاد الوجبة التانيه... و ممكن تعوضيه ب سناكس زي كوب لبن أو عصير فريش أو بطاطا في الفرن مثلا

٣- لما تقدمي أكل جديد سيبيه يشمه ويلمسه و يلعب بيه ما تقفيش على راْسه كُل كُل كُل....سيبيه يتعامل ولو رفضه دا مش معناه أبداً إنك ما تقدميهوش تاني بس فتره و إرجعي قدميه بطريقة تانية 

٤- لو طبختي اكلة وهو رفضها أبدا ما تعمليش أكل ليه مخصوص إحنا مش في مطعم والموجود الكل هاياكل منه ...ودا عشان ما تكبريش جواه فكرة إنه فعلاً مختلف ولازم تلزميه إن طول وقت الأكل يفضل قاعد على طاولة الأكل حتى لو رافض الأكل (من غير عصبية )

٥- أُطلبي منه المساعدة دايماً وانتوا بتنقوا الخضار والفاكهة ..و إنتوا بتغسلوهم و انت بتحطيهم في الثلاجة ...اطلبي منه كمان يوضب ترابيزة الأكل

٦- قعدة الاكل لازم تبقى ممتعه بالنسبه ليه يعني هنجيبله طبق ملون ومعلقة و شوكة و كوباية ألوان ...وحضريله مع الأكل صوص من الحاجات اللي بيحبها يعني صوص جبنه ..صوص باربيكيو ...كاتشاب ( طبعا كله معمول في البيت) عشان يغمسوا فيه الخضار اللي مش بيستطعمه

٧-لازم تكوني قدوة ليه في الاكل زي ما إنتي قدوة ليه في التصرفات وبقدر الإمكان لازم يكون أكلك كله صحي و هو و من غير ما يحس هتلاقيه بيقلدك

٨- ممنوع تشغيل التليفيزيون او اي اجهزه إليكترونية أثناء الأكل ولازم يكون التركيز في الأكل فقط...كمان تحاشياً لإعلانات الحلويات اللي ممكن تبوظ شهيته وتخليه يبطل أكل

٩- لما تيجي تكافئيه على حاجه كويسه عملها... المكافئة متكونش حلويات لإن دا بيبعت رسايل ل مخ الطفل إن الحلويات دي أفضل أكل على الإطلاق ودا اللي بيزود رغبته ليها كمان...مش بقول نمنع الحلويات خالص بس ممكن نقدمها يوم او يومين في الأسبوع

١٠- خليكي مبدعة 

يعني لو الولد مش بيحب البيض واللبن حطيهم على بعض مع شوية سكر وإعملي كريم كراميل

مش بيحب اللحمة ...افرميها واعمليها برجر ....والنت مليان وصفات كتير هتساعدك...بس إنتي شدي حيلك

الموضوع مش سهل ومحتاج صبر و مش هتلاقي نتيجة بين يوم وليلة ...بس المهمات الصعبه دايماً بتكون للأبطال